- Aldri før er det blitt brukt så mykje pengar på fornybar energi og energieffektivisering i Noreg. Og satsinga er mangedobla under denne regjeringa. Dette er òg eit viktig klimatiltak, seier olje- og energiminister Terje Riis-Johansen.

Energifondet er dels finansiert frå eit påslag på nettariffen på 1 øre/kWh og dels frå statsbudsjettet og avkastinga frå Grunnfondet for fornybar energi og energieffektivisering (Grunnfondet). I 2009 er påslaget venta å gje ei inntekt på om lag 735 millionar kroner. Energifondet blir tilførd om lag 391 millionar kroner frå avkastinga på Grunnfondet. I tillegg er det er løyvd 200 millionar kroner over statsbudsjettet samt at renteinntektene på Energifondet er på om lag 100 millionar kroner.

Grunnfondet blei oppretta i 2007, med ein fondskapital på 10 milliardar kroner. Avkastinga frå Grunnfondet blir overførd kvart år til Energifondet, og utgjer ein monaleg del av inntektene til Energifondet. Regjeringa føreslår òg å styrkje Grunnfondet med 10 milliardar kroner i 2009. Dette gir ei langsiktig styrking av arbeidet. Avkastinga frå Grunnfondet er venta å bli på om lag 900 millionar kroner frå 2010.

Olje- og energidepartementet inngikk i juni 2008 ein ny avtale med Enova, som gjeld ut 2011. I avtalen er det fastsett eit nytt mål på 18 TWh/år fornybar varme- og kraftproduksjon og energisparing innan 2011. Basisåret er 2001. Mål om 3 TWh/år vindkraft og 4 TWh/år vassboren varme innan 2010 inngår òg i avtalen.