– Satsinga er ein viktig del av regjeringa sin visjon om å bli verdsleiande innafor utvikling av miljøvenleg energi, seier olje- og energiminister Terje Riis-Johansen. - Regjeringa ynskjer å styrkje forskinga på miljøvenleg energi. Blant anna vil vi skipe fleire toppkvalitets forskingssenter på prioriterte område innan fornybar energi og CO2-handtering, seier statsråd Riis-Johansen.

110 millionar kroner av Olje- og energidepartementet si satsing skal gå til å etablere forskingssenter for miljøvenleg energi. Dette er ei oppfølging av Energi21, som er styresmaktene og energibransjen sin strategi for satsing på forsking og utvikling for energisektoren. Gjennom ei ny støtteordning i regi av Noregs forskingsråd skal det bli etablert internasjonalt konkurransedyktige forskingssenter for særskilte tema. Næringslivet vil òg vere med. Forskingssentra vil samle det beste av norsk kompetanse til ein langsiktig og målretta innsats på viktige område der Noreg har mykje røynsle og konkurransekraft.

Stønaden til eit forskingssenter blir tildelt på basis av søknadsrundar, og storleiken på stønaden vil avhenge av senteret sin profil. Tema for sentra må liggje innafor klimavenleg kraft (til dømes vindkraft på havet og solkraft), CO2-nøytral oppvarming (til dømes bioenergi), energieffektivisering, CO2-fangst og -lagring og miljøvenleg transport. Forskingsrådet har fått 28 sentersøknader i steg ein i prosessen. 17 av desse er inviterte til å sende inn ein ny og meir utfyllande søknad. Målet er å etablere fem til sju forskingssenter for miljøvenleg energi i 2009.

I tillegg til sentersatsinga er forskinga på fornybare energikjelder og karbonfangst og
-lagring auka monaleg i budsjettet for 2009. Dette er gjort ved ei markert styrking av dei mest relevante forskingsprogramma i Noregs forskingsråd. Dette gjeld særleg programma RENERGI (forsking på framtidas reine energisystem) og CLIMIT (forsking på teknologiar for CO2-handtering). RENERGI-programmet blir åleine styrkt med om lag 100 millionar kroner frå fleire departement, av dette er 55 millionar kroner frå Olje- og energidepartementet. CLIMIT-programmet har frå før ein totalramme på 130 millionar kroner, og vil få tilførd ytterlegare 20 millionar kroner.

Regjeringa er opptatt av å leggje til rette for ei langsiktig og målretta satsing på fornybar energi på havet. I budsjettet for 2009 legg ein opp til å styrkje ordningar knytt til demonstrasjon av nye fornybare energiteknologiar offshore. Dette er eit samarbeid mellom Noregs forskingsråd og Enova, og byggjer på etablerte verkemiddel i dei to institusjonane.

–Forsking på fornybar energi er viktig for å nå klimamåla våre. Det er òg viktig for å oppfylle ambisjonen om at Noreg skal bli ein stor eksportør av fornybar energi i framtida, seier olje- og energiminister Terje Riis-Johansen.